小米啱啱出完紅米手機2,剛剛又出多一部旗艦機,不過個名並唔係小米手機5,而係小米Note,睇規格似乎係針對Samsung GALAXY Note 4 一類大屏幕手機。

金屬邊框 + 底面雙曲面玻璃
小米外形都算幾靚,金屬邊框加上機面同機背都係用康寧Gorilla Class 3曲面玻璃,拎上手感覺應該會冇咁鎅手。機身只有6.95mm厚,薄過iPhone 6 Plus。

機背玻璃比較彎,機面嗰塊嘅彎位就類似iPhone 6。

喇叭喺機底。

頂級規格 兩個版本
今次小米Note分為普通版同頂配版,兩個版本都有雙4G雙卡雙待,普通版配Qualcomm Snapdragon 801 2.5GHz 四核心CPU、3GB RAM、16GB / 64GB ROM、1,920 x 1,080屏幕、規格同而家啲高階機差不多。至於頂配版就勁啲,用咗Qualcomm Snapdragon 810 2.0GHz+1.5GHz 64-bit 4+4核心CPU、4GB RAM、64GB ROM、2,560 x 1,440屏幕,可以話係目前嘅最強規格。

普通版機身有黑色同白色,頂配版就係金色。

一個Slot插晒兩張SIM卡,一張Micro SIM一張Nano SIM。

單手模式可以將畫面縮細到4.5吋、4吋或3.5吋,方便單手操作。

至於兩個版本嘅小米Note同現有旗艦機規格比較,可以參考下下面個表。


相比之下,小米Note普通版嘅規格同LG G3、Samsung GALAXY Note 4差不多,雖然賬面價錢差一截,但實際上去連鎖電器舖買,例如LG G3,會即場減價$1,000或以上,再用埋信用卡優惠,例如Citibank X 豐澤最高10%回贈,再減多$250-$400,就變成相差一千蚊左右;如果買水貨機,都係$3,300左右,個價就相差無幾。至於頂配版用咗64-bit CPU同4GB RAM,都係為Android 5.0做好準備,追求效能嘅朋友可以考慮下。

自拍靚相
小米Note主鏡頭用咗1,300萬像素Sony相機,支援光學防手震,可以拍30fps嘅4K (3,840 x 2,160) 影片。而400萬像素前鏡頭有2微米像素感光元件,即係類似HTC嘅UltraPixel鏡頭,可以提高感光度,喺較暗環境自拍會比較清楚。如果大家想睇下小米Note影相效果,可以去官網睇下小米Note相機介紹嗰Part,有三張聲稱用小米Note影嘅相。

Hi-Fi級音樂體驗
小米Note其中一個賣點係Hi-Fi級音樂享受,同類設計亦出現喺魅族MX4 Pro身上。小米Note有獨立 ESS ES9018K2M DAC數位類比轉換晶片、2個TI OPA1612同2個ADI ADA4896放大器晶片,支援44.1kHz / 48kHz解碼。同埋佢支援192kHz / 24bit Hi-Res音源,APE、FLAC、DSD、WAV等無失真格式,聽歌可以原汁原味啲。加上小米聲稱可以推得郁600 ohm高阻抗耳機,可以用返自己隻靚耳機。雖然實際音質如何,都要聽過先知,估計音質點都會好過一般手機 (好唔過就死得啦),但可唔可以同獨立Player比,就好難講喇。

總結:期待頂配版
小米Note標準版嘅售價雖然保持到喺二千幾三千蚊,規格上同現有旗艦機接近,原本都有少少吸引,但某啲旗艦機愈減愈平,差價拉近,影響咗標準版嘅競爭力。標準版會喺1月27號喺小米大陸官網開賣,你搶唔搶呢?如果有心想搶返部,可以用東亞i-Titanium卡,會有3%回贈;用銀聯雙幣卡亦可以免外幣兌換手續費。至於頂配版,我就覺得可以留意下,如果其他大廠出呢個規格嘅機,賣到六、七千港幣都唔出奇,而家小米Note賣$3,299人民幣,大約$4,200港幣,都算抵玩。不過頂配版未知確實幾時開賣,睇下正式開賣前,會唔會有其他牌子出同級規格嘅機?