喺大家專注於點樣簽卡賺積分賺里數嘅同時,有一日收到月結單,見到無啦啦收多你一千幾百,先至醒起張卡係要收年費>.<。雖然銀行係有營運成本,不過在於我哋消費者嘅角度,呢啲支出梗係免到就免啦。一啲有記性嘅積分里數達人,定時定候聯絡銀行Waive咗佢,但係新手可能會有少少迷惘,到底點樣先可以免年費呢?

1. 打上客服熱線
呢個係最基本嘅方法,普通卡、金卡、甚至而家一街都係嘅白金卡,只要打上去客戶服務熱線度,要求豁免年費。如果張卡有簽過指定金額,甚至只係有簽過下,基本上都冇問題。而家部分銀行,例如中銀,熱線有專門豁免年費嘅Function,喺電話跟指示撳幾撳就搞掂,連搵CS對話都唔使。如果張卡真係冇乜點用過,佢亦都可能要求你下年要簽夠數先再有得Waive。最好就係記住張卡嘅年度到期日,之前一個月就打定去Waive。如果收到月結單要收年費,都可以打去CS,年費照交咗先,Waive完下期就會回返俾你。

2. 積分兌換年費
好多卡都可以用積分換豁免年費,但係要動用辛苦儲落嘅積分?No way!都係打咗上CS問咗先,如果真係Waive唔到先出此下策啦。

3. 永久免年費信用卡
一般信用卡都會有首一、兩年免年費,亦有部份卡係永久免年費,申請呢啲卡就一勞永逸啦。不過亦唔好咁大安旨意,因為有啲即時話係永久免年費,但亦都要每年簽夠數先得。有啲銀行甚至失驚無神改Terms,寄封信嚟話要收年費。

之前美女Lady C.都寫過關於永久免年費信用卡嘅Blog,大家有興趣想申請返一張,可以去重溫下 (請俾返廣告費我XD)。

年費恆久免 一張永留存(一)

年費恆久免 一張永留存(二)

年費恆久免 一張永留存(完)