最近成日都見人有人自拍敷面膜嘅相上網,你可能心諗,敷面膜啫,咁都要打卡呃Like?咁你就有所不知喇!事關近排好多造型獨特嘅面膜,敷咗上面之後好有戲劇效果,真係會忍唔到手同大家分享㗎!不過呢啲面膜通常都係日本出,個包裝寫日文,大家可能見佢得意就買咗。今次就出篇blog講吓呢啲搞鬼面膜嘅成份,方便各位唔識日文嘅人睇吓塊面膜有咩功用呀!

首先講吓一般面膜入面好常見嘅成份先:

Glycerin(甘油)
甘油係一種吸水性強(hygroscopic)嘅成份,佢可以補助肌膚補濕。

Collagen (骨膠原)
骨膠原可以幫助到肌膚緊緻,減少皺紋嘅出現。當肌膚除住年齡老化時,佢會慢慢喪失彈性蛋皘(elastin)及骨膠原(collagen),敷骨膠原嘅面膜或可以幫助到緊緻肌膚,令皮膚回復彈性。

Hyaluronic acid (透明質酸)
英文大家可能唔認得,但中文名透明質酸相信就一定聽過!透明質酸本身喺身體入面都有的,當用喺外用嘅護膚產品時,佢就有補濕嘅作用。

Vitamin E (維他命E)
好多護膚品都有維他命E,維他命E係一種抗氧化劑,可以保護肌膚免受自由基(free radical)嘅傷害。

Allantoin (尿囊素)
尿囊素有保濕嘅功用,佢可以軟化軟化角質,令皮膚保持水潤,同時令皮膚保持柔軟。

除咗以上成份,今次揀咗5款面膜同大家睇吓入面有啲咩成份。

江戶造型面膜

呢塊面膜係Pure Smile嘅出品,面膜係江戶嘅造型,味道就係綠茶味。喺佢個包裝正面底下,就有寫住有骨膠原(collagen)、透明質酸(hyaluronic acid)同埋維他命E。其實反轉佢背面,佢仲有寫其他嘢的。
呢塊面膜含有茶葉(茶樹樹葉/Camellia Sinensis Leaf)嘅精華,可以保持肌膚濕潤。而且有馬齒莧(Portulaca Oleracea extract )嘅抽取物,可以預防肌膚粗糙、調理肌膚。佢都有北美金縷梅(Hamamelis Virginiana (witch hazel) water)嘅成份,可以調整肌膚,有收緊皮膚嘅功用。喺成份表上面亦見到佢有熊果素(Arbutin),熊果素有亮白膚色嘅功用,佢透過阻止形成色素嘅酵素作用。佢亦有甘草酸鉀(Dipotassium glycyrrhizate),有抗炎止痕嘅功用,亦有指甘草酸鉀或可能輔助到美白。

Will you be a cat? 貓貓造型面膜
 

喵星人控注意!呢塊牛奶味面膜可以幫你變成喵星人同類(暫時)⋯⋯
呢塊面膜同樣喺包裝嘅面寫住有骨膠原(collagen)、透明質酸(hyaluronic acid)同埋維他命E。我哋睇埋佢成份表入面有啲咩先!佢同江戶面膜差唔多,有甘草酸鉀(Dipotassium glycyrrhizate)、馬齒莧(Portulaca Oleracea extract )、北美金縷梅(Hamamelis Virginiana (witch hazel) water)同埋熊果素(Arbutin)。唔同嘅位係喵星人面膜有牛奶蛋白提取物(Milk protein extract)預防肌膚粗糙,調整肌膚。

JIRO解剖造型面膜

JIRO系列嘅成份基本上同喵星人面膜一樣,係多咗樣咖啡因同少咗牛奶蛋白提取物。有指咖啡因可以有助收縮血管,當咖啡因用喺化妝護膚品上嘅時候,或者可以幫助到收縮眼肚位嘅血管,減少雙眼浮腫同黑眼圈。呢塊面膜嘅賣點係由日本嘅特技化妝師JIRO設計,仲配合一個「覺醒的味道」,到底係咩味呢?原來⋯⋯係菠蘿味。

今次仲特登開咗呢個巨人面膜敷同大家實戰報告吓!

開出來就傳來陣陣菠蘿味,原來呢個就係覺醒嘅味道,不過隻菠蘿味似藥水味,唔好聞。個面膜質地算薄,望落去有啲似薄切牛肉嘅感覺。

敷咗上面發現佢意外地貼面,而且精華量好多。去萬聖節party唔使化妝咁多步驟啦,敷個mask就搞掂喇!

講真真係幾似巨人㗎,加埋濕濕哋個感覺就更似。個mask仲有好多切口位,連鼻樑位置都有,夠晒貼面。成個mask最唔滿意就係個菠蘿味。

Hello Kitty造型面膜

Hello Kitty呢塊好似不倒翁造型嘅面膜加入咗玫瑰花水做補濕嘅效果,亦加入咗乳酸桿菌、大豆發酵抽取物,乳酸桿菌可以預防膚色陰沉,大豆發酵精華亦有良好嘅保濕效果。其他成份仲包括北美金縷梅、馬齒莧、甘草酸鉀、熊果素、骨膠原、透明質酸、維他命E。呢塊Hello Kitty面膜仲係好多人鍾意嘅玫瑰味。

梳乎蛋造型面膜

呢塊梳乎蛋面膜真係有蛋黃抽取物,可以保持肌膚健康,亦有牛奶蛋白提取物作調整肌膚之用。佢同Hello Kitty嘅成份都相似,都有乳酸桿菌、大豆發酵抽取物、北美金縷梅、甘草酸鉀、熊果素、骨膠原、透明質酸、維他命E。佢仲加上迷迭香抽取物,可以幫助收緊肌膚、減輕腫脹嘅作用,亦有費拉蘆薈抽取物,除咗有保濕效果,仲有舒緩癒合等效用。唔使擔心梳乎蛋塊mask會係蛋味,其實係雲喱拿味呀!

呢啲面膜冇話特別有一個功用,主要都係以保濕提亮為主,主要賣點都係佢個面膜嘅造型。當然佢哋每塊面膜嘅成份都會有加加減減,有啲可能會多啲消炎嘅效果,有啲可能有消除浮腫嘅效果,有啲多啲舒緩嘅效果。有得玩吓扮吓嘢又同時有護膚效果,都幾好吖!同大家總結吓呢幾塊面膜嘅重點先:

敷面膜小貼士:
1.唔好以為敷得越耐就越吸收呀!跟足包裝上面嘅時間去敷,如果敷得太耐,塊mask可能會倒轉吸番面部嘅水份,咁就得不償失啦!
2.通常拎咗塊面膜出來之後,袋入面都仲會有唔少嘅精華液。如果唔想浪費,可以喺敷完面膜後,倒埋袋入面嘅精華出來塗抹。
3/面膜唔好重複使用呀!咁樣會滋長細菌,唔衛生㗎。
4.可能買面膜時會大堆大堆咁購入,不過就未必會順序敷。記住耐唔耐要檢查吓啲面膜嘅到期日期呀!
5.如果出現紅腫或者敏感反應就唔好再用了。如果係第一次使用,建議先將面膜嘅精華搽喺手臂內側睇吓有冇反應先,再敷上面部。
6.如果發現面膜狀態異常或有異味,就唔好再使用喇!

由即日起至8月31日,於全線LOG-ON以AEON Visa payWave卡單一消費淨值每滿港幣250元或以上,即可獲贈sweets house Cha Cha北海道牛奶雪糕威化筒(價值港幣28元)或同等價值之雪糕威化筒贈券乙張。每張有效收據最多只能換領贈券三張。