上次篇ANA搞到「世界將我包圍」,老老實實有少少唔開心,因為唔知點樣解釋/點樣做先可以將件事完滿解決,但又唔想因為少少挫折就輕言放棄。朋友都知我呢期除咗呢件事之外,私事都有多少煩心嘢,於是就提議去海皮公園/迪迪尼放鬆吓……但呢期我哋冇Common Friends生日,原價買飛又真係好貴(我真係窮__嚟),都係做做功課先(其實去唔去得成都係問題)!

入場都有少少唔知玩咩好,年紀大又唔敢玩刺激嘢……

仲未去過反斗奇供同灰熊山谷主題果部份,我認我好Out……

以一張成人日間/標準門票計,除咗信用卡我仲比較埋中旅社、教協同工聯會(連其實我唔太信得過嘅淘寶都睇埋),似乎無論係海洋公園定係迪士尼,都係交通銀行同維港假期做嘅推廣(海洋公園$240/迪士尼$360)抵,不過個優惠期寫去到3月31日就完,同埋我都有少少質疑而家係咪仲係呢個價,會唔會已經有新嘅「優惠價」取代咗呢個舊有嘅全年優惠?

(**感謝Enoch Chiu、ClassyCalvin糾正中旅社價格!Thanks Thanks Thanks!)

其他信用卡優惠,概括地講除咗交銀,只要記得海洋公園拎工銀建行卡有9折;銀聯有95折;迪士尼就要去維港假期買,可用交銀或星展卡,係忠實Fans可考慮用渣打Visa買奇妙處處通套票,冇折但有得分期

Lady C.我唔清楚維港假期係買門票定係換票証,但中旅社門市就肯定係換票証。換票証嘅問題係,佢冇保證你一定可以入場,去到門口仲要排隊換入場門票,一個唔好彩(雖然機率唔高)……就不歡而散。順口講開,我爬文(詳見呢度呢度)見到呢度有師兄師姐討論過用唔用得卡碌中旅社呢筆帳,好似冇乜結論。穩陣起見,帶定現金去會比較好!

唔理用咩方法買平少少嘅入場門票啦,我想溫提吓大家有個「香港樂悠遊」優惠計劃(詳情可以睇睇個表),想玩勻全香港,留定收據啦!可恨!唔包迪士尼!