先同大家講聲:中秋節快樂!
(我忍唔住要入正題了)水公主我最近狂追日劇《半澤直樹》,由初初睇冇咩人講,至到而家唔少本地新聞都有報導其收視報捷,果然,水公主係有Taste既人!(被毆)

咳咳……講返正題,自《女管家三田》之後,水公主都有一段時間冇咩留意日劇(一日二十四小時唔夠用之故)。好坦白,對於主角堺雅人亦係零認識,呢部劇真正吸引我既係題材(水公主本身好鐘意睇黑暗面野)——
半澤直樹,身為東京中央銀行的銀行員,主要職務係負責審批借貸(同追數)。面對不負責任、貪財有私心既上司及串通好既商家,半澤直樹要在此立足、發圍、「以牙還牙;十倍奉還」!聽落好熱血勵志?咁又唔係啵,因為東京中央銀行正正係當年害死半澤直樹爸爸的原兇!咁點解半澤又要故意打銀行工,仲要間間都唔揀,係都要去返呢間呢?呢個正正係成套劇最大既謎,至今未解。

日日都要跑數,相信係唔少人既現實寫照

我覺得套劇並唔單係反映日本既社會面貌,水公主覺得套用於香港既層壓式管治狀況亦相當適合。千祈唔好以為劇入面咁極端既Case(咩事就自己睇啦,唔劇透)唔可能係現實發生,好似話虐待外傭單新聞咁,水公主最初都半信半疑,疑又多過信少少,真係估唔到罪成!「越大公司越腐敗」——我深深相信著。同時,呢套劇亦令我反思到底人面對不幸時,係要「有仇不報非君子」定係「大事化小、小事化無;能忍則忍」?


得喇,拍完未呀,水公主咪交左稿囉!信唔信我……

至於套劇入面既演員表現,除左主角(如果佢眼神唔兇狠、語氣唔認真又唔好戲,點引到咁多人睇?),水公主最鐘意就係金融廳檢查官主任黑崎啦!莫講劇本安排到佢同半澤直樹既關係咁微妙,佢既小動作同眼神唔細微,但都唔會令人覺得浮誇,算係為嚴肅劇本加點適度調劑。

唔知點解一見佢出場就開心!

《半澤直樹》今個星期日(22/9)就大結局啦!好期待佢大巴大巴咁煎落去壞人塊面度呀(希望有)!未睇既趁假期怒煲啦!順帶一提,岩岩睇到有報導話可能拍續集……嗯,唔係唔期待既,但有時中伏中得多,更加希望自己真正鐘意既事物可以「見好就收」囉……


紅到…出週邊「加倍奉還饅頭」都一推出黎就賣清光!有人去開日本唔該都買份返黎比我呀!
P.S. 水公主我覺得真係好適合經常留意銀行資訊既大家睇呀!誠意推薦!