近排有法案要限制網絡創作,有人喺香港光天化日之下人間蒸發,無人做到任何野。有個網台嘅頒獎禮贏盡口碑,但亦有人話只係港豬心理。政治、同港產片一樣,喺香港人心中,是又愛又恨?還是已經心死呢?偏偏就有班王晶口中的廢青,拍咗一套《十年》,一套被形容為「香港警世預言書」嘅《十年》。

呢套戲完全係極小本嘅獨立製作,一開始無任何宣傳,然而喺荷里活大片砂窩、港片葉問嘅強勢之下,由一開始只能搞特別放映,到喺電影中心上畫,愈開愈多場,場場爆滿,仲得到大量評論員、作家、唔同界別嘅社會人士力撐係香港最重要嘅電影之一!

但好可悲地,最新嘅情況係,百老匯院線因為「不明」壓力已經將之落畫。
十年?定現在?

大概講吓套戲講啲咩,俾本身未必知道呢套戲嘅你多一點認識。
《十年》係由五條短片合併而成嘅,主題係圍繞對香港社會十年後嘅想像。
第一條《浮瓜》講中央為推行可以控制社會嘅國安法,揾槍手扮暗殺議員,兩個以為可以從中拎著數嘅黑社會小混混,最後淪為炮灰,死得不明不白;
第二條《冬蟬》,講一對情侶不停收集同製造標本,想保留呢個城市中快速消亡緊嘅一切,最後心灰得只想將自己變成標本;

第三條《方言》,講十年後的士司機要考普通話試,唔識講嘅就唔可以去市區載客,廣東話已被邊緣化;
第四條《自焚者》就堅喇,講2025年香港人爭取港獨,英國領事館門口有人自焚,死者不明;而一個月前第一個因爭取港獨嘅年青人歐健鋒陽喺獄中死去。呢兩件事引起社會廣泛討論。

片中以偽紀錄片形式扮係訪問各界人士,講出好多句拳拳有力,一矢中的嘅對白。比如多次開名鬧共產黨就係老千!講真,共產黨三個字真係好似佛地魔咁,有邊套戲真係試過光明正大咁提?!「香港人好唔中意聽到自己俾共產黨強姦嘅論調,好似好抗拒咁,事實係都不知幾享受!」

呢啲說話聽落好唔舒服?because its so true!

最後一條《本地蛋》,講本地嘅細路仔全部都需要加入「少年軍」,舉報同批鬥所有關於「本地」嘅事物。主角智叔嘅仔仔講:我唔想㗎,但我唔知可以點。好直白,好簡單,講出咗港人嘅心聲:唔係享受呀,係我唔知可以點呀。但有啲文化,我地唔守,係真係會無。

然而種種荒謬嘅情節,喺今日香港都唔再荒謬,大家聽完,都係哦一聲便算。套戲好唔好睇好見仁見智,點都會有人覺得話嘩好dark呀,放工都係想輕鬆吓啫。Well,的確,悲觀啲講,香港人窮得只剩下娛樂。但電影嘅使命除咗娛樂,仲包括帶俾人反思同覺悟。如果你都關心香港,趁佢未完全被迫逼之時,買飛入場支持都會係一個唔錯嘅選擇。依家套戲仲喺UA上緊,用東亞World萬事達卡買飛,會有8折。