信用卡唔係人人有,但講到可以四圍嘟嘅八達通,一人最少一張是常識吧?不過八達通唔係點嘟都得,有時想用起嚟先至發現……負錢?又要搵地方增值!尤其係朝早,就因為排隊增值果短短幾分鐘,又遲到?雖然話就話緊有一間喺咗近,但講方便同為避免意外,Lady C.我投自動增值一票


    Hello Kitty成人版八達通配飾岩哂Pink Lady(不過我唔係)

我明,坊間有好多人都覺得自動增值唔安全,萬一跌咗張八達通俾人喪碌咪唔得掂?事實係,無論選擇用邊間銀行嘅邊張卡做自動增值,八達通同銀行都有相應措施去保障大家,包括:

  • 每日只可以自動增一次(金額視乎個人選擇同銀行而定)
  • 只須承擔報失後3小時內的損失

咁用自動增值,比起手動增值,有咩好處先?先唔講出張同八達通公司合作推出嘅聯營卡有得賺迎新,單係用現有嘅信用卡申請八達通自動增值,已經有呢啲著數:

  • 首次申請通常都有特別優惠,低至增值$0.8/$1(<<下篇講)
  • 有回贈,低至$150/$1(簽$150回$1蚊)
  • 部分增值額可以轉成里數,低至$6 /1里
  • 部分信用卡可以幫親朋好友、附屬卡持有人申請

亦即係話,喺現金交通工具可加唔減機制下,一個月當交通使費連雜費(譬如去阿信屋買零食、去吉野家食牛肉飯)約$1,500,一個月可慳$10或賺250里!唔好唔記得仲可以幫2位親友做自動增值,條數就自然越滾越大!當然啦,呢度講緊係基本嘅回贈,都仲未講特別推廣……但資料真係太多,請大家容許Lady C.我先貼所有銀行信用卡嘅自動增值一覽表,下次再同大家分享特別推廣!(如無意外會聽日交到編輯手上)




有關申請

  • 美國運通信用卡不設八達通自動增值服務,另外渣打AE卡不適用而DBS Black AE適用(感謝hk235m更正)
  • 非個人八達通、特別版八達通都可以申請八達通自動增值服務
  • 學生申請,要先申請學生個人八達通,後申請自動增值服務
  • 有八達通PC閱卡機可試自行在網上啟動服務,會比等收信快
  • 信用卡卡名有「八達通」的話,出卡時應已填埋自動增值服務表格,唔需要另外搞

親友申請

  • 唔等同必需係附屬卡持有人
  • 歲數需為12歲以上
  • 即一張卡名下最多可以幫3張唔同八達通申請自動增值

轉會/重新啟動

  • 轉會/重新啟動,係需要繳付$20手續費,邊張卡都一樣
  • 轉會前最好先將自動增值金額設定成$250,因為部分銀行不提供$150/$500

現金回贈 /里數

  • 我係以我認知中最普及的卡去計算,有部分卡係有更抵嘅回贈比率
  • 有部分卡冇現金回贈呢個選項,係以簽賬換分再換禮券去計數
  • 未計入任何特別推廣的情況下計數
  • 基本係以對「亞洲萬里通」里數計劃,如果該銀行只對應其他飛行回贈計劃,會在備註中說明

總結
未計入特別推廣的情況下——

  • 現金回贈大勝 = 安信$150:$1
  • 里數回贈大勝 = Citibank Prestige信用卡 / 交通銀聯雙幣鑽石卡 $6:1
  • 申請辦法及增值金額選擇多 = 渣打 / 安信
  • 可申請2合1八達通信用卡 = Citibank / 建行