美國運通之前宣佈咗會喺香港國際機場開亞洲首個The Centurion Lounge,依家已經確定係10月2號(下星期一)正式開幕。呢個The Centurion Lounge加入咗唔同港式元素係裡面,即刻同大家分享!

設施及服務
The Centurion Lounge門口係藍色透明玻璃,雖然白金卡同Centurion Card都免費進入Lounge,但部分服務需要Centurion Card登記先有:

白金卡同Centurion Card喺登記後入Lounge就會見到會議室、附設電腦嘅工作空間同私人電話間:

經過工作區域後,就係餐飲區域,包括酒吧同自助餐,有電子告示板可以睇到航班資料,唔怕掛住歎或航班調動而miss咗班機:

酒吧方面,有由著名調酒師Jim Meehan精心調配嘅特色雞尾酒,例如由威士忌調製而成、以藍色門口命名嘅「Blue Door」,仲有有葡萄酒權威Anthony Giglio挑選嘅紅酒:

嘢食方面,Lounge提供各地美食嘅自助餐,例如點心拼盤、香煎龍脷柳配酸豆忌廉醬同雲呢拿芒果奶凍:

喺餐飲區右邊就係洗手間同私人淋浴間:

而喺餐廳區左邊係Centurion Card登記處,登記後就可以享用休息專區同埋限定菜式:

休息區除咗可以靜靜哋休息之外,仲可以打電話要求會員服務人員提供安排旅程、訂位等等嘅個人服務:

限定菜式由香港洲際酒店欣圖軒主廚劉耀輝師傅設計,以港式為主,包括叉燒酥、泡菜豬肉春卷、黑松露窩貼大蝦、砵酒大根牛面珠、蜜汁叉燒配白飯同燕窩雞蛋撻:

期間限定精品
除咗剪綵儀式有名人出席外,仲有今日限定嘅香水區域同特色雞尾酒。
喺今日嘅香水區域裡面,可以睇住調香師示範,調配特別為呢個Lounge而設嘅香水「Pearl of the Orient」。而全個Lounge嘅範圍,甚至連Lounge入面所用嘅紙都係用呢隻香味:

左邊係今日發佈會限定嘅「TEA-QUILA HIGHBALL」,只有在場人士(包括我) 有得試!而右邊係招牌Cocktail「BLUE DOOR」,不過佢竟然唔係藍色嘅:

入場條件
The Centurion Lounge只限美國運通白金卡同Centurion Card可以免費入,所有聯營卡都冇呢個優惠。白金卡會員最多可以有2位同行人士入去,免費使用呢個Lounge,而Centurion Card可以用直系親屬或最多2位同行人士入去。如果超過咗限定人數,可以以每位$50美金買單日通行證,不過要視乎當時供應而定。

位置:鄰近61號登機閘口