好多人去旅行都要仍然要網不離身,Upload食相風景相、打卡,不停Update status仲忙過返工。其實呢,我覺得去旅行應該俾自己真正放鬆下,細心感受下異地風情,放低部手機,俾條頸抖下啦,低頭族!不過,我都知去旅行要搵食肆、查地圖、交通,手機上到網又的確係方便啲嘅。

去外國要流動上網,一係買本身電訊商嘅日費Plan,一係買漫遊卡,近來就興租俗稱「Wi-Fi蛋」嘅Pocket Wi-Fi流動Wi-Fi裝置,可以Share俾幾個朋友或幾部機一齊用。本地有唔少Wi-Fi蛋租借服務,我搵咗幾間格下價:

租借步驟多數都係出發前1至4日上網預訂或者直接去門市辦手續,去完旅行返到香港後一日還機。部分公司可以安排速遞送貨同收機,或者喺機場有辦事處,唔使特登走多轉去攞機。基本上,日費最低由$60起,視乎地區而定。Citibank恒生都有同Wi-Fi蛋租借服務商合作,租機有折頭,想再平啲可以去望下。

除咗價錢,仲有啲地方要留意,租機時記住有咁詳細問咁詳細:
-當地流動網絡連線可能係3G或者4G,甚至係2G,上網速度自然有影響。
-個別地區未必有無限數據任用。
-即使覆蓋咗某個國家,亦未必覆蓋當地所有地區。