國泰同港龍都係香港人常搭嘅Airline,佢哋除咗有Asia Miles可以儲里數換機票之外,仲有Marco Polo Club馬可孛羅會提供其他飛行常客服務,例如優先留位揀位、辦理登機手續專櫃、額外行李限額、享用機場貴賓室等等。每個會員級別可以享用嘅服務都有唔同,愈高級自然愈多著數。而要升級,就要靠搭飛機嚟儲夠指定「會籍」里數或「會籍」航段。喺出年4月15日起,沿用開嘅「會籍」里數 / 航段方式將會變成用會籍積分計算,現有會員或有興趣入會嘅就要留意喇。

100積分起跳
現行制度級別所需「會籍」里數同「會籍」航段:
喺新制度下,現有會員級別 (綠卡、銀卡、金卡、鑽石卡) 繼續維持不變,每級積分就分為:

綠卡 100分
銀卡 300分
金卡 600分
鑽石卡 1,200分

咁會籍積分要點儲呢?會按航班目的地同距離分為超短途、短途、中途、中長途、長途及超長途航班,以搭國泰航班由香港出發為例:


順便List埋目前會籍所需「會籍」里數 / 航段。

超短途
中國 (重慶、杭州、昆明、寧波、廈門)、菲律賓 (克拉克/呂宋島、馬尼拉)、台灣、越南 (峴港、河內)

短途
孟加拉、柬埔寨、中國 (北京、成都、上海、西安)、印度、印尼、日本、韓國、馬來西亞、緬甸、尼泊爾、菲律賓 (宿霧)、新加坡、斯里蘭卡、泰國、越南 (胡志明市)

中途
澳洲 (開恩茲)、馬爾代夫、阿聯酋

中長途
澳洲 (阿德萊德、布里斯班、墨爾本、珀斯、悉尼)、巴林、卡塔爾、沙特亞拉伯

長途
加拿大 (溫哥華)、法國、德國、意大利、荷蘭、紐西蘭、南非、瑞士、英國、美國 (洛杉磯、三藩市)

超長途
加拿大 (多倫多)、美國 (波士頓、芝加哥、紐約)

以綠卡為例,以往升銀卡要30,000「會籍」里數或20「會籍」航段,新制要300會籍積分,經濟艙 (Y、B、H、K、M、L、V) 現制可以儲到1「會籍」航段,通通都係20程;但新制經濟艙分開三級,超短途Y、B、H、K子艙位有10分,M, L, V子艙位得5分,就分別要30程或60程,對於超短途常客,想升級或者續期似乎都難咗喎。不過而家S、N、Q子艙位儲唔到「會籍」里數 / 航段,新制都會有分,叫做好過冇啦。如果坐長途計,新制可能都要坐多一、兩程。


國泰網頁出咗會籍積分計算器,可以睇到航班將會賺到幾多分。

續期、新入會費用加至100美元
而家綠卡只要會籍年度內儲到4個會籍里程就可以Keep住會籍,新制就要儲到100分,或者俾100美元續期,同而家俾50美元比,加咗一倍呢。

新制申請入會都一樣加一倍,要俾100美元,不過入會年齡降到12歲 (連呢樣都要小朋友贏在起跑線?)。所以如果想入會,就趁而家仲係50美元快啲Join喇,又或者申請美國運通國泰航空尊尚信用卡會員或美國運通國泰航空信用卡,可以豁免入會費,免費申請綠卡。

新舊制如何交接?
正如之前講過,新制會喺2016年4月15日起開始實施,舊制儲落嘅「會籍」里數同「會籍」航段 (以較高者為準) 會按比例轉為會籍積分。如果綠卡會員係新制實行時唔夠100會籍積分,只要有最少1「會籍」里數或「會籍」航段 ,都可以免費續期一年。

會籍假期
如果飛行常客因事短期內暫停密飛,新制加咗會籍假期,可以暫停會籍長達12個月,雖然喺呢段時間冇得用會員服務,亦儲唔到積分,但唔飛都可以保住會員級別,唔怕Downgrade。而一生人可以有三次會籍假期。

新增優惠
喺級別優惠方面,基本上同而家差不多,冇乜大改變。不過叫得做新制,都有啲新優惠嘅,包括:

機場貴賓室使用券
儲分除咗可以升級或續期,仲可以賺機場貴賓室使用券,俾指定對象入國泰、港龍或指定夥伴嘅機場貴賓室。

級別 / 積分要求 / 可獲機場貴賓室使用券張數 / 使用對象 / 可用機場貴賓室級別
綠卡 / 到達200分 / 1張 / 卡主會員或同行貴賓 / 商務機場貴賓室
銀卡 / 到達450分 / 2張 / 卡主或同行貴賓 / 商務機場貴賓室
金卡 / 到達800分 / 2張 / 同行貴賓或「兌換名單」內成員 / 商務機場貴賓室
鑽石卡 / 到達1,400分 / 2張 / 同行貴賓或「兌換名單」內成員 / 商務或頭等機場貴賓室

預訂艙位升級
金卡同鑽石卡儲到某個分數,可以有若干次預訂國泰或港龍單程提升一個艙位級別,鑽石卡任何航程都可以Upgrade,正喎!

級別 / 積分要求 / 單程艙位提升預訂券張數 / 適用航程
金卡 / 到達1,000分 / 4張 / 超短途或中途
鑽石卡 / 到達1,600分 / 4張 / 任何距離

鑽石卡送金卡
鑽石卡儲到1,800分,可以送出一個12個月金卡提名會籍俾親朋戚友。無啦啦上金卡,咁著數去邊度搵?所以如果你身邊有人係鑽石卡會員,記得巴結定佢啦XD。