澳門10月賭收回升,會唔會代表濠賭股見底回穩係言之尚早,不過好想關注此板塊的股友可以持續留意幾個數據,捕捉時機。

首先整體賭收回升不代表每場賭場都受惠,通常澳門博彩監察協調局公布每月賭收之後,大行都會以該月賭收分布計以賭收市佔率,而部分財經資訊網站都會報道。

10月數據方面,銀娛(00027)和金沙(01928)賭收佔比有上升,銀娛更加重上第一。相反美高梅(02282)、永利(001128)、澳博(00880)同新濠系都跌,美高梅跌幅最大。銀娛佔比再做一哥的原因或者係銀河二期開幕,如果按此邏輯,新濠系未來幾個月表現可能有改善。

再者,賭收表現雖然好重要,不過失去貪腐豪客的今天,單靠賭就等執笠。今時今日仲要睇酒店入住率(過夜客多唔多)、商場和其他娛樂項目的收入,還有相當重要的成本攤薄。吊詭之處在於客人減少再擴張,其實可以提升營運效率,因為原本多餘的資源可以分配到新場,既不用裁員,亦可善用現有資源。

一般業績會用EBITDA(Earnings Before Interest, Taxes, Depreciation and Amortization)(扣除利息、稅項、折舊及攤銷前的盈利)反映綜合表現,因為此計算方法集中統計期內的盈利能力,以第三季季績睇,主要濠賭股中,以美國上市的新濠博亞表現最好。無錯,你無睇錯,因為新濠博亞的非博彩業務遠勝其他同業,所以即使賭收一直不算特別優異,但交出好表現。

不過EBITDA也有不足地方,它不包營運資本和折舊,而此兩項成本可以相當高,比如設施較舊、損耗較高的公司就蝕底。

再強調,別漏了基本估值方法。

本文不構成任何股份買賣建議。
作者無持有任何上述股份。