剛剛我同班朋友去咗東京四日,去買下食下咁。朋友知道我之前寫過有關外遊租Pocket Wi-Fi (Wi-Fi蛋) 嘅 Blog,就叫我負責租隻Pocket Wi-Fi Share嚟用。考慮到會幾部機同時上網,我揀咗Telecom Square隻Softbank 304ZT 4G 無限數據 (每日$88),雖然面價佢唔係最平 (最平可以做到每日$30),但用DBS Black Card租有7折,每日$60多啲 (唔計速遞費),都可以接受。同埋佢有速遞、門市同機場T2取還機,機場還機仲係24小時,可以慳埋速遞費。

首先睇下佢有幾大隻,從面積嚟講只係比張八達通大少少。

厚度亦係$1直徑一半多啲,重150g。

一開即用
拎到機之後,基本上乜嘢設定都唔使搞,去到日本一落飛機,開機即用,用手機好似平時連Wi-Fi咁就用到。若果隻蛋喺旅途中有咩問題,都可以打24小時英語Hotline求救。

喺部機睇返SSID同密碼,其實機背都有貼紙寫住,唔需要入設定睇。

喺成田機場落機,出咗閘即刻開機用。

今次住池袋,酒店附近吃喝玩樂都好集中。

行過去P’PARCO Evangelion Store見下綾波麗,當然唔少得掃貨。


Sunshine City 入面嘅 Pokemon Center MEGA TOKYO,Fans必到。

去上野公園諗住睇櫻花,可惜太遲,得返少少仲有花。

去秋葉原掃Game掃Figure。

喺女僕Cafe坐咗一陣,同女僕影完相即刻Upload上Facebook (女僕照片恕不刊登)。

YouTube送咖喱飯。

喺日暮里坐Skyliner去成田機場返香港,行駛中上網睇YouTube都非常暢順,當時一共有4部手機一齊連緊,都冇咩影響速度。

用後感-速度高且穩定
扣咗頭尾兩日,基本上只有兩日時間活動,所以今次去嘅地方唔多,只有池袋、上野、秋葉原、原宿,主要都係買同食。呢啲地方都係東京市區,所以Wi-Fi蛋接收到好好,上網速度感覺同香港4G或屋企Wi-Fi差不多,好快就Load到網頁,睇YouTube亦流暢,開Google Map搵目的地同帶路反應都夠快,上Facebook、Whatsapp亦自然冇問題。

我喺唔同地方用Speedtest.net手機App,試咗連線速度:

地點 / 下載速度 / 上載速度 / Ping
成田機場 / 35.48Mbps / 9.52Mbps / 82ms
池袋 / 26.73Mbps / 5.12Mbps / 42ms
上野 / 16.97Mbps / 3.47Mbps / 60ms
秋葉原 / 18.17Mbps / 6.02Mbps / 62ms
原宿 / 26.06Mbps / 8.59Mbps / 72ms
Skyliner行駛中 / 29.46Mbps / 6.36Mbps / 71ms

上傳速度普遍都有5Mbps以上,Upload一張相去Facebook、Instagram,兩、三秒就完成。下載速度平均都有20Mbps以上,即使四、五個人四、五部機Share,都唔會太慢。而各自喺酒店房,都可以連到線,唔知係咪酒店啲牆薄。當然,唯一唔好處就係唔同持蛋人一齊活動,就冇得用。

至於電量方面,內置電池有2,700mAh電量,由朝早11點叉滿電出去,一直開住,間唔中開下Google Map、Whatsapp、Facebook,到夜晚8點返到酒店放低戰利品,都仲有20%電剩,可以頂到半日,帶個6,000mAh或以上嘅「尿袋」就可以叉完電話再叉Wi-Fi蛋,足夠一日行程。除咗日本,佢嘅Wi-Fi蛋喺超過100個國家都有服務,特別係歐洲指定國家日費$77,算抵用。

租蛋還是買卡好?
去旅行租蛋還是買卡好,其實好睇情況,如果你一個人去,只係需要基本或輕量上網 (Whatsapp、Facebook、Google Map),或者無時無刻都要Keep住在線,買卡會比較啱用,一來唔需要太多用量,例如一張富士卡,$120行Softbank 3G網絡,包1.8GB可用7日,每日就有大約250MB。二來唔需要帶多舊嘢跟身,輕便啲。如果好似我今次咁一班人去,而好多時間都係集體活動,租Wi-Fi蛋就比較著數。下面有個Pocket Wi-Fi租借服務比較表,大家可以參考下。


好喇,基本交待過今次行程,下次會講下買嘢退稅同埋簽卡要留意嘅嘢。

相關文章
日本遊(下)-購物篇
日本遊 (補完篇)-信用卡海外簽賬匯率