嚟到六月尾,唔少銀行都準備推出新一輪信用卡優惠,例如匯豐近呢兩年都喺暑假期間推出「最紅大折日」(詳情),簽賬有額外回贈或「獎賞錢」。好喇,即刻睇下今年點玩法。

一般商戶5%回贈
今次「最紅大折日」主要針對本地消費,由6月27號至8月31號,只要累積簽賬滿$3,000 (單一簽賬滿$500或以上),就會有5%「獎賞錢」回贈。網購都一樣計,只要網站係香港註冊同用港幣交易。而每星期同全期都有回贈上限限制,會因應唔同信用卡而有分別 (可以參考下面資料)。

指定商戶8%回贈
今年嘅指定商戶有萬寧、百老匯電器同加德士,優惠開始日期係7月1號。回贈率去到8%,同埋回贈上限Quota主要都係指定商戶,即係谷你去指定商戶買嘢。不過記住,去萬寧買一號嬰兒奶粉係唔計嘅。

「獎賞錢」回贈上限
匯豐運籌理財白金Visa卡、Visa Signature卡、白金Visa卡、Green信用卡
每星期:$200「獎賞錢」(包括其他商戶最多$50「獎賞錢」)
整個推廣期:$1,400「獎賞錢」(包括其他商戶最多$300「獎賞錢」)

其他信用卡
每星期:$200「獎賞錢」(包括其他商戶最多$50「獎賞錢」)
整個推廣期:$1,200「獎賞錢」(包括其他商戶最多$300「獎賞錢」)

萬寧額外送$600「獎賞錢」
除咗8%「獎賞錢」回贈之外,去萬寧買嘢仲有額外4%回贈,回贈上限每星期$100「獎賞錢」,整個推廣期$600「獎賞錢」。

加德士入油每公升減$2
加德士油站本身有同匯豐卡夾全年優惠,入白金或黃金汽油每公升減$0.9,「最紅大折日」推廣期內就每公升減$2,再加埋8%「獎賞錢」回贈,變相慳唔少喎。另外星期五、六、日去入油,單一簽賬滿$400,就可以用85折買原價$500嘅StarCash儲值卡,每次可以買兩張,即係又慳咗$150。

其他優惠
-喺時代廣場單一簽賬滿$500可以參加抽獎。
-喺指定地點出示信用卡同合資格本地簽賬單據正本可以換雪糕一杯。
-6月27號至7月19號期間,累積簽賬滿$10,000,可以參加抽獎,贏兩場Slide the City Hong Kong日間或夜間無限次體驗門票兩張 (每張價值$480)。

點樣賺盡「獎賞錢」?
如果係指定商戶以外嘅消費,5%回贈,每星期上限$50「獎賞錢」,即係簽$1,000就夠,全期上限$300「獎賞錢」,即係可以簽6個星期,總金額$6,000

計完「最紅大折日」,仲有「最紅自主獎賞」,如果因應返平日6X同星期五11X獎賞倍數消費,簽$1,000:

倍數 / 1星期可賺 / 6星期可賺
6X / $24「獎賞錢」/  $144「獎賞錢」
11X / $44「獎賞錢」/  $264「獎賞錢」
Visa Signature額外3X:
9X / $36「獎賞錢」/  $216「獎賞錢」
14X/ $56「獎賞錢」/ $336「獎賞錢」

當逢星期五都簽夠數,11X就可以賺到$44 x 6 + $300 = $564「獎賞錢」,Visa Signature 14X就有$56 x 6 + $300 = $636「獎賞錢」,回贈比率分別有9.4%同10.6%。如果換成里數,可以分別換到8,460 里數 ($0.709 / 里數) 同9,540里數 ($0.629 / 里數) ,隨時抵過賺迎新。

由於去指定商戶有8%回贈,加上萬寧再有額外「獎賞錢」,要賺到盡,自然係去萬寧買嘢最著數啦。

不論係8%還是4%,都係每個星期簽$2,500就賺盡,就當優惠期內張白金卡淨係要嚟買萬寧,咁就可以賺到$1,400 + $600 = $2,000「獎賞錢」,總支出就係$17,500。當然,個個星期買$2,500嘢,唔係人人都有咁多嘢要買,可以考慮買現金券,可以留返遲啲慢慢用,送俾親戚朋友用,又或者折讓賣返出去。不過大前提係,你要買到現金券囉。

再計「最紅自主獎賞」,當倍數放晒落「賞家居」,要留意11X每季只計頭$9,000簽賬,之後星期五簽卡就會得返6X:

倍數 / 1星期可賺 / 7星期可賺
6X / $60「獎賞錢」/ $420「獎賞錢」
11X / $110「獎賞錢」/ $600「獎賞錢」
Visa Signature額外3X:
9X / $90「獎賞錢」/ $630「獎賞錢」
14X / $140「獎賞錢」/ $810「獎賞錢」

又當每個星期五都買夠數,11X就可以賺到$600 + $2,000 = $2,600「獎賞錢」,Visa Signature 14X就有$810 + $2,000 = $2,810「獎賞錢」,回贈比率分別有14.86%同16.06%。如果換成里數,可以分別換到39,000里數 ($0.449 / 里數) 同42,150里數 ($0.415 / 里數),夠飛日本有突啦 。