上次講完2015年信用卡嘅優惠,今次講下迎新獎賞。同上次一樣,主要集中講1月1日開始嘅迎新,不過有啲仍然係熟口熟面嘅。

星展:DBS Black卡$2=1里數
之前DBS Black卡迎新做$3=1里數,全新客戶仲有3日2夜免費酒店住宿。新迎新就得返里數優惠,但就變咗額外$2=1里數。迎新額外獎賞以$250=4DBS$計算,全新客戶頭兩個月嘅頭$7,500,額外連埋基本獎賞 (Black卡本地簽賬$250=2DBS$,48DBS$=1,000里數),一共會賺到$3,750里數,計落即係$2=1里數。(記住佢要每1,000里數齊頭咁換呀)

Citibank:規矩照舊
雖然Citibank信用卡啲迎新都係1月1號開始,不過基本上都冇乜變過,迎新優惠同之前一樣。Rewards信用卡會送超市Coupon,加埋基本賺到嘅分數,回贈都有7%,如果簽$9,000都係食正5X積分,就會變成45,000分,可以抵銷$180簽賬,再賺多啲。

至於PremierMiles卡,佢本地簽賬$8=1里數,迎新加基本積分可以做到差不多$1=1里數,都OK㗎。

恒生:記得網上申請
好多信用卡網上申請都有額外獎賞,成功網上申請恒生卡,7日內交齊文件,就有額外$100 Cash Dollars,而且冇簽賬要求,全新或現有客戶都有份,就算頭兩個月簽唔夠$6,000,食唔到迎新,都仲有少少「渣拿」。

富邦:白金卡或Titanium卡必備
申請得富邦信用卡,主要都係申請白金卡或Titanium卡,因為可以換里數,台灣簽賬有20X積分,星期六、日$300以上本地簽賬2X積分,係儲分儲里數必備嘅卡之一。佢嘅迎新優惠一樣冇變,頭3個月簽夠$2,800就有50,000分,應該冇乜難度啦。網上申請會有額外10,000分,盡量網上申請喇!不過富邦積分有效期得一年,每次換里數最少要俾$250,最多$500,又貴過其他銀行少少,果然針冇兩頭利呢。再順帶一提,佢嗰啲簽賬積分優惠做到2月28號,不過嘉嘉我覺得佢之後應該會繼續做落去嘅。

大新:ANA香港白金Visa卡要搵推薦人
近期大新ANA香港白金Visa卡都幾Hit,因為佢有個推薦計劃,推薦人會有1,000里數,最多推薦10個人賺10,000里數,被推薦人都有2,000里數同$100超市現金券 (詳情可以睇返 C姐 (Lady C.) 呢篇Blog),加埋被推薦人本身嘅5,000里數迎新,總共7,000里數,而且被推薦人收到卡之後,亦可以做推薦人,繼續薦人賺里數,好似玩傳銷咁呀XD。不過佢平時$8=1里數,唔算特別易儲。

至於ONE+信用卡就總共有6%現金回贈,但最少要頭3個月簽$10,000以上先有,唔算特別吸引。

渣打:$1=1里數
雖然渣打WorldMiles卡呢個迎新做咗好耐,做到1月31號,不過見佢網上成功申請,頭兩個月簽$8,000計$4=1里數 (本來$5=1里數),加埋額外送$6,000里數 (90,000分),即係簽$8,000=$8,000里數 ($1=1里數),都算抵玩,就講埋啦。