鄧洢玲(阿旦)身材惹火,做過o靚模,但唔代表佢冇頭腦。佢無耐前就同閨密合資過百萬開精品按摩店,初嘗老闆滋味,揚言服務質素監控得好,唔怕同其他按摩店貨比貨,「最驚係人哋唔知有呢個地方。」不過事實上,阿旦預過開店頭3個月可能1個客都冇,「要守幾個月都係咁燒銀紙,個心好慌!」最差情況需要向銀行貸款嚟維持營運。

 

想做「全方位多功能藝人」

 

做過o靚模,之後參加主持比賽,進入電視台做藝人,直至參加ViuTV真人騷《G-1格鬥會》為止,o靚模嘅印象一直纏繞住阿旦。好多人片面咁認為,o靚模只係樣靚身材正,阿旦為自己平反話,「冇人睇你默默負出嘅嘢,譬如我做咗4年娛樂新聞主持冇人知道。」阿旦話,「其實幾唔公平。」公唔公平都好,阿旦冇再為o靚模二字而介懷。

回想初初由o靚模轉型做藝人嘅時候,需要同經理人分拆佣金,每月只剩下不足1萬蚊作收入,「但我都有默默做好呢份工,去等待唔同嘅機會。」

結果機會出現了。阿旦因為參加ViuTV真人騷《G-1格鬥會》而為人認識,依家仲擔任談性節目《啪啪聲,太好聽》嘅主持,曝光率急升。冇金龜射住嘅阿旦,最近同閨蜜合資過百萬,喺銅鑼灣開咗間精品按摩店「Blossom – The Secret Garden」。

 

▼要阿旦參加拳拳到肉嘅G-1格鬥比賽,粉絲大叫心痛

 

▼打到面都有唔少傷痕

 

最差情況:3個月1個客都冇

 

無論係幕前定幕後生涯,抑或《G-1格鬥會》嘅賽事同訓練,阿旦已經打過一場又一場硬仗,但創業呢個新戰場,比以前嘅硬仗更難打。因為開鋪已經花咗佢多年嘅積蓄,另外部分資金係來自已過世爸爸嘅保險金,「所今次只許成功,不許失敗……Daddy喺後面撐住我!」

「創業難,守業更難」,阿旦坦言開鋪至今「每一日都好似燒緊銀紙」。佢同拍檔傾過,生意最差嘅情況可能開店頭3個月1個客都冇,「要守幾個月都係咁燒銀紙,個心好慌!」需要有足夠儲備金應付營運開支。若情況持續,自言信貸紀錄良好嘅阿旦話,會事前比較銀行息口同還款年期,透過銀行借貸嚟維持店鋪營運,「但絕對唔希望發生!」

 

▼日前按摩店grand opening,唔少親朋好友到賀

 

▼按摩店面積1,500方呎,主要做按肩頸

 

試過晒師父手勢

 

阿旦本身係鍾意揼骨嘅「骨精」,第一盤生意就搞按摩店,可謂順理成章,「選擇做生意同選擇工作一樣,都係揀自己鍾意嘅行業。」佢認為,好多香港人同阿旦一樣,工作忙碌,生活壓力大,需要一個地方按摩,放鬆身心,「抖擻精神,第二日再搏過,我覺得香港人好需要。」阿旦唔需要進行拍攝嘅日子,往往會返按摩店打點,順便喺呢個自己嘅小天地接受按摩,一樣抖擻精神後,繼續幕前嘅工作及打理生意。

所有按摩師父功力都試過晒,招攬師父時態度同笑容亦係關鍵,又會統一佢哋嘅按摩手勢,阿旦自信咁話,服務質素監控得咁好,唔怕同其他按摩店貨比貨,「最驚係人哋唔知有呢個地方。」

 

▼所有師父嘅手勢,阿旦都試過晒

 

▼間唔中阿旦都會返嚟按摩,唔使去其他按摩店